Мәжілісте 8 наурыз – Халықаралық әйелдер күніне арналған салтанатты іс-шара өтті. Онда Палата спикері Ерлан Қошанов әйелдер қауымын төл мерекесімен құттықтап, атқарып жатқан жұмыстары үшін алғысын білдірді, – деп хабарлайды aqshamnews.kz тілшісі.
Ерлан Қошанов Мәжілістегі әйел депутаттар азаматтардың сұранысы мен талап-тілегі ескерілген көптеген заңның қабылдануына зор үлес қосып келе жатқанын атап өтті.
Жиын барысында Ерлан Қошанов былтыр Мемлекет басшысы 8 наурыз қарсаңында жаңа дәстүрдің негізін қалап, әйелдер қауымының бірқатар өкілін мемлекеттік наградалармен марапаттағанын айтты. Бұл үрдіс биыл да жалғасын тауып отыр.
– Бүгін Президентіміз елге еңбегі сіңген әйелдер қауымының бірқатар өкілін мемлекеттік наградалармен марапаттады. Вице-спикер Дания Еспаева үшінші дәрежелі «Барыс» орденімен марапатталды. Депутаттар Снежанна Имашева мен Екатерина Смышляева «Қазақстанның еңбек сіңірген қайраткері» атанса, Ирина Смирнова «Қазақстанның еңбек сіңірген ұстазы» мәртебелі атағының иегері атанып отыр. Бұл Қасым-Жомарт Кемелұлы Тоқаевтың Мәжілістегі арулардың бәріне берген жоғары бағасы, – деді Ерлан Қошанов.
Сонымен қатар, Палата спикері Президенттің атынан Мәжіліс депутаты Екатерина Смоляковаға «Құрмет» орденін, Мәжіліс Аппаратының қызметкерлері Райхан Адиловаға, Рауза Жайшиева мен Айгерім Нұржановаға «Ерен еңбегі үшін» медальдарын табыстады.
