Табылған көне мыс пен күміс тиындардың фотосуретін археолог 4 ақпанда өзінің әлеуметтік желідегі парақшасында жариялаған. Андрей Астафьевтің айтуынша, тиындар Маңғыстау облысындағы Қарақабақ қалашығын зерттеу кезінде анықталған.
- Мыс және күміс тиындар табылды. Бұл ол кезеңде сауда-көлік торабы болған осы аумақтың Парфиямен, Хорезммен, Маргианамен, Бұхара Соғдысымен, Тохаристанмен, Қытаймен және Византиямен тығыз сауда байланысы болғанын көрсетеді, – деп жазды археолог.
Зерттеуші Шерқала тауы маңындағы сауда алаңынан табылған тиын Аспабота полисіндегі сауда белсенділігінің басталу кезеңін анықтауға мүмкіндік беруі мүмкін екенін атап өтті.
- Бұл — Маңғыстаудан табылған көне тиындардың бірі. Ол Аспабота полисінде сауда қашан басталғанын шамалауға негіз береді. Табылған жәдігер — Аршакидтер әулетіне жататын Парфия патшасы Ород II-нің (б.з.д. 57–38 жж.) күміс драхмасы. Тиын Траксиана деп аталатын, Парфия тарихында аталған шығысирандық өңірде соғылған, – деп жазды Астафьев.
Археологтың айтуынша, тиындар жалғыз олжа емес. Зерттеу барысында қыш құмыралар да анықталған. Бұл олжалар ежелгі тұрғындардың тұрмыс-тіршілігі мен мәдени ерекшеліктерін тереңірек түсінуге мүмкіндік береді.
- IV ғасырда Аспабота/Қарақабақтың қыш шеберлері Солтүстік Кавказ үлгісі бойынша қыш ыдыс жасауды меңгерген. Алайда оларды өздеріне тән, қайталанбас өрнекпен әшекейлеген. Дәл осы өрнек Маңғыстаудың бірегей мәдени белгісі болып саналады. Сол кезеңде кең таралған пішіндердің бірі — биік тұмсықты құмыра тәрізді ыдыстар. Олардың қызметі орта ғасырлар мен қазіргі заманның құмғандарымен ұқсас, – деп атап өтті сарапшы.