ҚР Праламенті Мәжілісінің депутаттары «ҚР сот жүйесі мен судьяларының мәртебесі туралы» Конституциялық заңға өзгерістер мен толықтырулар енгізу туралы» Конституциялық заң жобасын бірінші оқылымда мақұлдады, деп хабарлайды almaty-akshamy.kz ҚазАқпаратқа сілтеме жасап.
Құжатты әріптестеріне Мәжіліс депутаты Нәзилә Раззақ таныстырып, Парламент Мәжілісінің Заңнама және сот-құқықтық реформа комитетінің төрағасы Арман Қожахметов қосымша баяндама жасады.
Депутаттар аталмыш заң жобасын бірінші оқылымда мақұлдап дауыс берді. Айта кетейік, аталмыш заң жобасының басты мақсаты – сот жүйесін одан әрі дамыту.
«Заңнамалық өзгерістер судьялардың кәсібилігін, сондай-ақ жауапкершілігі мен тәуелсіздігін арттыруды көздейді. Бұл мақсатқа жету жолында басты 3 бағытқа назар аударылды. Ол, ең алдымен, сот жүйесін қаржыландыруға байланысты. Соттардың қаржылық дербестігі – сот билігі тәуелсіздігінің негізгі көрсеткіштерінің бірі. Сондықтан халықаралық тәжірибе бойынша сот жүйесі бюджетінің мөлшерін пайызбен белгілеу ұсынылады», - деді Мәжіліс депутаты Нәзилә Раззақ.