Моңғолияның Ұлан-Батыр қаласында өтіп жатқан Азия чемпионатында қазақстандық боксшы Махмұд Сабырхан жартылай финалда жеңіліп, жарысты қола жүлдемен аяқтады, – деп хабарлайды aqshamnews.kz тілшісі.
Ұлан-Батырда өтіп жатқан Азия чемпионатында Қазақстан құрамасының өкілі Махмұд Сабырхан жүлдегерлер қатарынан көрінді. 55 келі салмақта сынға түскен боксшы турнирді қола медальмен аяқтады.
Ақтық сынға берілер жолдама үшін өткен кездесуде Махмұд Сабырхан жергілікті спортшы Билгуунсайхан Хархуумен қолғап түйістірді. Жекпе-жек қорытындысында қазақстандық былғары қолғап шебері 0:5 есебімен төрешілер шешімі бойынша жеңіліс тапты.
Осылайша, Махмұд Сабырхан Азия чемпионатының қола жүлдесін қанағат тұтты.
Айта кетейік, Махмұд Сабырхан – қазақ боксының танымал өкілдерінің бірі. Ол 2023 жылы IBA нұсқасы бойынша, 2025 жылы World Boxing ұйымы аясында әлем чемпионы атанған. Сонымен қатар, 2024 жылғы Азия чемпионатының жеңімпазы.
Еске салайық, бұған дейін 50 келіде сынға түскен Санжар Ташкенбай Үндістан боксшысына есе жіберсе, 80 келідегі Ерасыл Жақпеков өзбекстандық Фазлиддин Еркинбоевтан жеңілген болатын.