Қазақстанның жаңартылған конституциясының жобасы саясаткерлер ғана емес, мәдениет саласындағылардың да назарын аударып отыр, – деп хабарлайды aqshamnews.kz тілшісі.
Олар заңның халыққа түсінікті әрі ашық бола түскенін бірауыздан айтып отыр.
Қазақстанның еңбек сіңірген қайраткері Жеңіс Сейдоллаұлы жаңартылған құжат елдің даму жолын айқындайтынын айтады.
«Конституцияға енгізілген жаңа өзгерістер – біздің гүлденген болашағымызға жасалған қадам. Олар әділетті әрі құқықтық мемлекет құруға көмектеседі. Бұл реформа елді алға бастайтынына сенгіміз келеді».
Ол өзгерістер елдің жүйелі әрі әділетті дамып келе жатқанына азаматтардың сенімін нығайтуы тиіс екенін атап өтті.
Әсет Иманғалиев құжаттың мемлекет үшін стратегиялық маңызына назар аударды. Оның айтуынша, жаңа конституция ұзақ мерзімді даму мен құқықтық тәртіпті нығайтудың негізін қалайды:
«Жаңа конституция – әділетті әрі құқықтық ел құруды көздейді».
Заң тек ресми мәтін ғана емес, қоғам өміріне бағыт-бағдар беретін құжат болуы тиіс дейді.
Қазақстанның еңбек сіңірген қайраткері Сәбит Әбдіхалықов тіл мәселесіне тоқталды. Бұрын орыс тілінен аударғанда, конституцияның қазақшасын көбі түсінбей жататын. Жаңа жобада осы жағы ескерілгенін айтады.
«Бұрын конституцияны зерделеу оңай емес еді, әсіресе орыс тілінен қазақ тіліне аударғанда тіпті қиындатып жіберген. Жаңа жобада бұл ескеріліп, енді құжат әр қазақстандыққа түсінікті болды».
Ол заңның түсініктілігі мен қолжетімділігі азаматтардың мемлекетке деген сенімін арттыруда маңызды рөл атқаратынын атап өтті.
Жалпы алғанда, мәдениет саласының өкілдері жаңартылған конституцияны заңды қабылдауды жеңілдететін әрі мемлекеттік үдерістерді қоғам үшін ашық ететін құрал ретінде бағалайды.