Ертең Алматы музейінде 18 мамыр – Халықаралық музейлер күні аясында көрнекті мемлекет және қоғам қайраткері, этнограф-ғалым Өзбекәлі Жәнібековтің өмірі мен қызметіне арналған «Мәдени майдан» атты көрме ашылады, деп хабарлайды Almaty-akshamy.kz
Көрмеде Ө.Жәнібековтің отбасынан алынған фотолар, архивтік құжаттар, еңбектері мен марапаттары, киімдері, жеке заттары, қолжазбалары, эскиздері, Алматы музейі қорынан Ө.Жәнібековтің үлгісі бойынша тігілген «Сазген сазы» ансамблінің алғашқы орындаушысының сахналық киімі, фотосуреттері, музыкалық аспаптар мен Әзірет Сұлтан Мемлекеттік тарихи-мәдени музей қорығының қорынан Ө.Жәнібековтің жеке заттары және т.б. ұсынылады.
Ө.Жәнібековтің бастамасымен елімізде жүзге жуық музей мен этнографиялық залдар ашылып, «Сазген сазы», «Шертер», «Адырна», «Алтынай» фольклорлық-этнографиялық, ән-би ансамбльдері, театрлар, «Казреставрация», «Бірегей ысқымен ойналатын музыкалық аспаптардың мемлекеттік коллекциясы» құрылды. Сондай-ақ, Ө.Жәнібековтің арқасында Ұлы даланың бірқатар ескерткіштері сақталды. Қалпына келтірілген ескерткіштердің қатарында Қожа Ахмет Яссауи, Тәжік, Қарахан, Айша-бибі, Ақ-ұйық және Бабаджа-Хатун кесенелері мен Жаркент мешіті және Отырар археологиялық ескерткіштері бар.
Ө. Жәнібековтің тікелей ықпалымен қазақтың төл мейрамы Наурыз қайта жанданып, қасиетті Тайқазан Қазақстанға қайтарылды.
А.Байтұрсынұлы, М.Жұмабайұлы, М.Дулатұлы, Ж.Аймауытұлы, Ш.Құдайбердіұлының істерін қайта қарау комиссияны құрудың бастамашысы болды. Нәтижесінде Алаш зиялыларының даңқты есімдері қайта тірілді.
Көрменің салтанатты ашылуында Ө.Жәнібековтің замандастары, қызметтес болған әріптестері, шәкірттері мен ұрпақтары қатысып, естеліктерімен бөліседі.