Жасөспірімдерге салуға болатын әлемдегі жалғыз вакцина америкалық Pfizer Қазақстанға жылдың соңында әкелінеді деп жоспарланып отыр.
Қазан айынан бастап 2 миллион жасөспірім коронавирусқа қарсы екпе алады, деп хабарлайды Almaty-akshamy.kz
ҚР Денсаулық сақтау министрі Алексей Цойдың айтуынша, 12 мен 18 жас аралығындағы балалар мен жасөспірімдерге ата-анасының немесе асыраушысының рұқсатымен ғана екпе салынады.
Алексей Цой қазір мыңдаған азамат балаларына вакцина салғызуды сұрап отырғанын айтты. Өйткені, вирустың «дельта» штамы тек ересектер ғана емес, балалардың арасында да жылдам таралуда.
Дәл осы мутациялық вирустан Солтүстік Қазақстан облысында таяуда 1 жастан асқан бөбек қайтыс болды. Дәрігерлер кішкентай балаға вирус ата-анасынан жұққанын хабарлады. Жыл басынан бері Қазақстанда 34 мың бала коронавирус жұқтырып, оның екеуі көз жұмған. Қазір 558 бала стационарлық ауруханада емделіп жатыр. Вирус жұқтырған жаңа туған 13 нәресте дәрігерлердің бақылауында болса, 4 сәбидің жағдайы ауыр.
Денсаулық сақтау министрі Алексей Цой жасөспірімдерге вакцина салу арқылы балалардың ғана емес, вакцинаға қарсы көрсетілімі бар ересектердің де өмірін сақтап қалуға болатынын мәлімдеді. Айта кетейік, Pfizer екпесі 12 жасқа толмаған балаларға салынбайды.