Алматыда құқық қорғау органдары интернет-алаяқтық пен несиелерді заңсыз рәсімдеу фактілеріне қатысы бар қылмыстық топтарды әшкерелеп, жалпы шығыны 300 млн теңгеден асатын қылмыстардың жолын кесті, деп хабарлайды Aqshamnews.kz тілшісі.
Тергеу деректеріне сәйкес, алғашқы эпизодта күдіктілер өздерін мемлекеттік орган және банк қызметкерлері ретінде таныстырып, негізінен қарт адамдарды алдап соққан. Олар азаматтардың пәтер сатудан түскен қаражатын және банк депозиттеріндегі ақшасын иемденген. Ақшаны беру фактілері жеткізу қызметтерінің курьерлері арқылы жүзеге асқан.
Екінші жағдай бойынша әлеуметтік осал топтағы адамдардың атына қайтарымсыз автонесиелер рәсімделіп, кейін көліктерді қайта сатып жіберген ұйымдасқан топ анықталған. Кей автокөліктердің Қазақстан аумағынан тыс жерге шығарылып, қайта сатылғаны айтылады. Қаржы ұйымдарына келтірілген шығын 66 млн теңгеден асқан.
Жедел-іздестіру және тергеу шаралары барысында 10-нан астам күдікті ұсталып, бір адамға іздеу жарияланған. Сондай-ақ ондаған тінту жүргізіліп, ақша қаражаты, қару, ұялы телефондар және құжаттар тәркіленген.
Алматы қаласының прокуратурасы азаматтарға ескерту жасап, мемлекеттік органдар мен банктер ақша талап етпейтінін, «қылмыстық іс» деп қорқытып немесе қоқан-лоққы көрсетіп қоңырау шалмайтынын мәлімдеді. Күдікті қоңыраулар болған жағдайда дереу құқық қорғау органдарына хабарласу қажет.