Абай атындағы Қазақ ұлттық опера және балет театрында Құрманғазы Сағырбайұлының 205 жылдығына орай «Күмбірлеген күй атасы – Құрманғазы» атты концерті ұйымдастырылды.
Концертте опера және балет театрының жетекші әртістері мен Нұрғиса Тілендиев атындағы Мемлекеттік академиялық фольклорлық-этнографиялық «Отырар сазы» оркестрі қатысты.
«Күй ұлтымыздың үні мен сөзі болған, халқымыз дүниеге әкелген көркем құндылықтардың шыңы. Ал, Құрманғазы - ұлттық мәдениет пен музыканы әлемдік деңгейге шығарған өнер иесі. Халқымыз үшін күй мен Құрманғазы есімі бір-бірімен астасып кеткен ұғым. Ол ұлтымызға, елімізге ортақ, адамзат мәдениетінің тарихында өшпес із қалдырған тұлға. Кеште Құрманғазының рухын асқақтатып, тыңдаушының жігерін оятып, серпілдіретін танымал күйлері орындалады. Ол күйлер – тағдырдың талқысына, өмірдің қаталдығына музыка арқылы берілген жауап, жанашырлығының белгісі», – дейді ҚР Еңбек сіңірген қайраткері Нұржан Байбосынов.
Сонымен қатар, бағдарламада Ахмет және Ғазиза Жұбановтардың «Құрманғазы» операсынан ария мен дуэттер шырқалып, Базарбай Жұманиязовтың «Махамбет» операсынан ария, Нұрғиса Тілендиев, Дина Нұрпейісова, Евгений Брусиловскийдің шығармалары орындалады. Сондай-ақ, кеште опера солистері Талғат Күзембаев (ҚР Еңбек сіңірген әртісі, ҚР Мемлекеттік сыйлығының лауреаты), Балапан Жұбаева (ҚР Еңбек сіңірген әртісі), Ильяс Артағалиев, Есенгелді Рза, Айдос Жабағин, Төлеген Рахымбаев өнер көрсетті.
