Қала тұрғындары мерекелік көріністерге риза болды.
Алып шаһар Алматыда Наурызнама аясында театрландырылған керуен жүріп өтті.
Оған батыр, бүркітші, ақын және басқа да образдағы 1000-нан астам адам қатысты.
Сонымен қатар, қала тұрғындары мен қонақтары арбадағы киіз үйді, қыз күймесін, қоржынға жібек маталар мен кілемдер артқан түйелерді, ат үстігдегі батырларды, құмай тазылар мен мергеншілерді, жалпы жеті қазына нышандарын тамашалады.
Думанды шараға қатысқан қала тұрғындары мен қонақтары мерекелік көріністерге риза болды.
«Мен зейнеткермін, жасым 73-те. Біріншіден барлықтарыңызды Наурыз мерекесімен құттықтағым келеді. Қателеспесем, мұндай үлкен көшті соңғы рет, ұлы Абайдың 150 жылдық мерейтойында көрген едім. Бүгін мінекей, екінші рет куә болып отырмын. Жылда осылай, тойлай берейік», - деді қаламыздың тұрғыны Марзия Ержанқызы.
«Көш. Наурыз – думан» мерекелік керуені, Абай даңғылының бойымен, батыс бағытта Достық даңғылынан Абылай хан даңғылына дейін, одан кейін Абылай хан даңғылымен солтүстік бағытта Астана алаңына дейін жүріп өтеді.
Осылайша, Наурыз мерекесі Алматыда бар сән-салтанатымен тойланып жатыр.
