Алматыда «Тазару күніне» орай ұйымдастырылған Наурызнама онкүндігі аясында қала жастары Астана алаңында экологиялық акция өткізді, – деп хабарлайды aqshamnews.kz тілшісі.
Бұл күні алаңда жастардың қатысуымен мерекелік концерт ұйымдастырылды. Іс-шара аяқталғаннан кейін алматылық еріктілер бірден аумақты тазалауға кірісті.
Жас белсенділер алаң маңындағы аумақты тазалап, ретке келтіріп, қоқыс жинады. Осылайша қаланың тазалығын сақтауға үлес қосты.
«Тазару күні» – бұл тек бір реттік акция емес. Бұл қоршаған ортаға жауапкершілікпен қарауды қалыптастыратын маңызды бастама. Концерттен кейін бірден тазалық жұмыстарын бастап, қаламызға деген жанашырлығымызды көрсеткіміз келді. Біз Алматыны таза әрі көрікті шаһар ретінде көргіміз келеді», – деді акция қатысушысы Айша Берікова.
Аталған науқан қала көлемінде ұйымдастырылып, экологиялық мәдениетті қалыптастыруға және қоршаған ортаға жанашырлықпен қарауды насихаттауға бағытталған іс-шаралардың бір бөлігіне айналды.