Алматы қаласының Қылмыстық-атқару жүйесі департаментіне қарасты №11 мекемеде Жамбыл атындағы қалалық жасөспірімдер кітапханасының мәдени іс-шара ұйымдастыру бөлімінің қызметкерлерімен бірлесіп Астана күні аталып өтті.
Іс-шараның мақсаты – еліміздің бас қаласы Астана туралы, оның жетістігі, барлық жақсысы жайында жасөспірімдерді хабардар ету.
Іс-шара кітапханашылардың Астана қаласы туралы баяндамасынан басталып, елорданың тыныс-тіршілігін паш ететін кітап көрмесімен жалғасты. Түзеу мекемесінде жазасын өтеп жатқан жеткіншектер кітаппен серік екенін байқатып, Астана туралы викториналық сұрақтарға белсене қатысып, білім-білігін де ортаға салды. Кітап оқуға құштар балалар сыйлыққа кітап алды.
Іс-шара соңында №11 мекеменің тәрбие бөлімінің бастығы, әділет подполковнигі Алма Қойшыбайқызы осындай іс-шаралар жасөспірімдердің эстетикалық талғамын дамытатынын айтып, жазалы балаларға қатарластарынан қалмай, қоғамға, ортаға дұрыс тәрбиелі азамат болып оралуына тілек білдірді.