Алматының төрт колледжі техникалық және кәсіптік білім берудің жаңаша үлгісін ұсынып, Құзыреттілік орталықтарының жұмысымен таныстырды. Қазақстан Президентінің бастамасымен жарияланған Жұмысшы мамандықтар жылы аясында қала әкімдігі мен Білім басқармасының қолдауымен колледждер еңбек нарығында сұранысқа ие кәсіби мамандарды даярлау тәжірибесін көрсетті.
Баспасөз турын Өңірлік коммуникациялар қызметі мен Білім басқармасы бірлесе ұйымдастырды. Алматы көпсалалы колледжі, Алматы энергетика және электрондық технологиялар колледжі және Алматы құрылыс-техникалық колледжінің базасында WorldSkills чемпионатына дайындық лагерьлері жұмыс істейді. Мұнда электромонтаж, өндірістік автоматика, автокөлікті техникалық қызмет көрсету, IT, сантехника және жылыту, құрғақ құрылыс, дәнекерлеу және жиһаз өндірісі бойынша оқыту заманауи жабдықтар мен тәжірибелі тәлімгерлердің басшылығымен өтеді.
Алматы көпсалалы колледжінің директоры Асылхан Бейсетбаевтың айтуынша, түлектердің 87%-дан астамы оқуды аяқтаған соң бірден жұмысқа орналасады. Дуалды оқыту аясында бұл көрсеткіш 100%-ға жеткен. Мысалы, жиһаз өндірісі бағыты бойынша студенттер бірінші курстан бастап өндірістік тәжірибеден өтіп, кейін сол кәсіпорынға жұмысқа орналасады.
Алматы құрылыс-техникалық колледжінің бөлім меңгерушісі Бауыржан Мұхамеджанов студенттердің халықаралық жарыстардағы жетістіктерін атап өтті. Жақында Польша мен Францияда өткен байқауда қазақстандық студент жүлделі орын алып, «Үздік маман» медальонын иеленген. Бұл — еліміз үшін бұрын-соңды болмаған жетістік.