Көкшетау қаласында Президент Қасым-Жомарт Тоқаев жариялаған Жұмысшы мамандықтар жылы аясында «Құрмет саған, құрылысшы!» атты республикалық айтыс ұйымдастырылды.
Шараға еліміздің әр өңірінен белгілі айтыскерлер жиналып, еңбек адамдарының мәртебесін жыр арқауына айналдырды. Айтыстың бас демеушісі – «Жакупов» ЖК құрылыс компаниясы.
Ақмола облысының әкімі Марат Ахметжанов айтыстың ашылу салтанатында құрылысшылардың ел дамуына қосқан үлесін атап өтті. Айтысты белгілі ақын, қоғам қайраткері Аманжол Әлтаев жүргізіп, қазылар алқасына танымал ғалымдар мен мәдениет қайраткерлері енді.
Сахна төрінде Шымкент, Павлодар, Ақтөбе, Алматы, Түркістан, Жамбыл және Ақмола облыстарынан келген айтыскер ақындар сөз сайысына түсті.
Мәдени шара халықтың еңбек адамдарына деген құрметін айшықтап, жұмысшы мамандықтарының абыройын арттыруға ықпал етті.