Қазақстанда Тәуелсіздік күні қарсаңында әлеуметтік желіде де, ел дүкендерінде де ерекше патриоттық бастама қызу талқыланып жатыр. Астанадағы азық-түлік дүкенінен басталған челлендж бүгінде басқа да қалаларға жетті. Аqshamnews.kz тілшісі мереке қарсаңындағы тың дүниелерді тізді.
4 мыңнан астам шар, мыңнан аса тумен безендірілген дүкен
Тредс желісінде Астана қаласындағы азық-түлік дүкенінің суреттері тарады. Онда "Әзірет Маркет" атты қарапайым тұрғын үй кешеніндегі дүкеннің Тәуелсіздік күніне безендірілгенін байқауға болады.
"Әзірет маркет" дүкені Астананың оң жағалауында орналасқан. Дүкен иесі Темірхан Әшімұлы өз сауда нүктесін мыңдаған көк шар мен мемлекеттік тумен безендіріп, нағыз мерекелік атмосфера сыйлады. Бұл әрекеті көпшіліктің көңілінен шығып, өзге кәсіпкерлерге де үлгі болды.
"Бұл арқылы Тәуелсіздік күнін жай ғана ресми дата емес, ел болып сезінетін, мақтаныш пен шүкірлікке толы ерекше күн ретінде атап өтуді мақсат еттім. Әр қазақ үшін, әр қазақтандық үшін бұл күн қашан да елеулі орын алуға тиіс", - Темірхан мырза.
Көп адам дүкен ішін фото-видеоға түсіріп, әлеуметтік желіге жүктеп жатыр.
Тугис қосымшасында да дүкенге жылы пікірлер қалдырып жатыр.
Халықтың қолдауы мен Қоянбаевтың реакциясы
Бастама әлеуметтік желіде лезде тарады. Пайдаланушылар пікір қалдырып, Темірхан мырзаның азаматтық ұстанымын, патриоттық ниетін ерекше атап өтіп жатыр. Пікірлер бөлімінде:
"Балаларымызға нағыз патриотизм осылай көрсетілу керек", "Мерекенің рухын сезіндік", "Тәуелсіздік күні өтпей жатып, Жаңа жылға дайындалып кеткендерге үлгі болсын" деген сынды пікірлер жазылып жатыр.
Белгілі продюсер Нұрлан Қоянбаев та бұл бастаманы қолдап, өзінің парақшасында атап өтіп, кәсіпкердің идеясын оң бағалады. Дүкен иесінің идеясына ризашылығын білдіріп, саудасын да жүргізіп кетті.
Челленджге басқа дүкендер де қосылды
Темірхан Әшімұлының бастамасы жай ғана дүкеннің ішінде қалып қойған жоқ. Оның идеясын елуден астам адам бөлісіп, кей кәсіпкерлер бірден эстафетаны жалғастырып әкетті.
Бірнеше дүкен иелері:
-
өз сауда орындарын көк шарлармен, жалаушалармен, баннерлермен безендірді;
-
мереке қарсаңында келушілерге шағын сыйлықтар, жеңілдіктер қарастырды;
-
Тәуелсіздік күніне арналған арнайы фотозоналар ұйымдастырды.
