Шымкентте 24 жастағы Үмітжан Балтабаев бесінші қабаттан құлап қайтыс болды. Ол жалдамалы құрылысшы болған.Марқұмның жақындары құрылыс алаңында қауіпсіздік талаптары сақталмағанын айтып, кінәлілердің жауапқа тартылуына талап етіп отыр, - деп хабарлайды Аqshamnews.kz тілшісі “Информбюро” бағдарламасына сілтеме жасап.
Ұлын жұмысына аттандырған Фатима Ибрагимова екі сағаттан кейін баласы туралы суық хабар алған.
“Өз қолыммен жұмысқа жібердім. Екі сағаттан кейін балаң қайтыс болыпты деп естіртті. Мен жынды болып қалайын дедім. Екі сағаттан кейін өліп қалайын деп. Бесінші этаждан құлаған. Жерге түскен бе, басқа жерге түскен бе оны білмеймін. Соны мен білгім келіп жатыр. Қалай менің балам қалай жерге түскен”, – дейді марқұмның анасы.
Қайғылы оқиға Шымкент қаласындағы тұрғын үй кешені салынып жатқан алаңда болған. Үмітжан Балтабаев мердігер компанияға келісімшартсыз жалданып, қара жұмыс істеген. Марқұммен бірге ауылдағы досы да еңбек еткен. Ол құрылыс аумағында ешқандай техникалық әрі қауіпсіздік талаптары сақталмағанын айтады.
“Баспалдақ саңылауына кетіп бара жатқанда ашық жатқан лифт бар. Сол жаққа былай көзім түсті. Аяқ киім көргеннен кейін басымды тықсам, жатыр. Қауіпсіздік техникасы жоқ. Мысалы, басқа нысандарға барсаң лестницы проём жабық болады. Баспалдақ саңылауы жабық болады. Оған адам кіре алмайды”, – дейді Үмітжанның досы Азизбек Закиров.
Қара жамылған отбасы бұл жағдайды құзырлы орган өкілдері тексеріп, кінәлі адамдарды жауапқа тартсын деп отыр. Айтуларынша, тәртіп сақшылары мән-жайды анықтауға асықпайды. Қазір жұмысшы өлімі бойынша тергеу жүргізіліп жатыр екен.
“Полициямен аталған жазатайым оқиға бойынша қылмыстық іс қозғалды. Қазіргі таңда оқиғаның барлық мән-жайын анықтауға бағытталған кешенді тергеу іс-шаралары жүргізіліп жатыр. Тергеу аяқталғаннан кейін іс бойынша процессуалдық шешім қабылданады”, – деді Шымкент қаласы полиция департаментінің баспасөз қызметі.
Құрылыс компаниясының өкілдері сұхбат беруден бас тартты.
Марқұм Үмітжан Балтабаев үйінде 4 ұлдың тұңғышы. 7 жасында әкесінен айырылған жас жігіт үйінің жалғыз асыраушысы болыпты. Туыстары жігіттің жуырда шаңырақ көтеруді де жоспарлап жүргенін жеткізді.