Маңғыстау облысының Түпқараған ауданында Каспий теңізі жағалауынан экологтар 112 өлі итбалықты тапты, - деп хабарлайды Aqshamnews.kz.
Ведомствоның мәліметінше, 3 қараша күні Ақтау тұрғындарынан теңіз жағалауына өлі итбалықтардың шығып қалғаны туралы хабар түскеннен кейін зертханалық-талдамалық бақылау бөлімінің мамандары тексеру жүргізген.
«Балық инспекциясы басқармасымен бірлесіп, Асан елді мекенінен Баутино мүйісіне дейінгі жағалау сызығын бақылау барысында каспий итбалықтарының өлекселері табылды. Оның ішінде 39-ы - Асаннан Форт-Шевченко қаласының жағажайына дейінгі аралықта, ал 73-і - жағажайдан Баутино мүйісіне дейінгі бөліктен табылды», - деп хабарлады департамент.
Сонымен қатар мамандар теңіз суынан зертханалық талдау үшін сынамалар алып, оқиға туралы ақпаратты 112 қызметіне жолдаған.