Алматы қаласында өткен «Қызмет бағыты бойынша колледж директорларының орынбасарларының әдістемелік материалдарының қалалық конкурсында» Алматы мемлекеттік бизнес колледжінің оқу-өндірістік жұмысы жөніндегі директордың орынбасары Дуйсенбаева Улжалгас Камаловна «Наубайхана шеберлігі» құзыреттілік орталығының жұмысын ұйымдастыруды жетілдіру тақырыбындағы әдістемелік жұмысымен І орынға ие болды.
Байқау барысында ол «Наубайхана шеберлігі» құзыреттілік орталығының үздіксіз жүргізіліп келе жатқан жұмыстары мен қол жеткізген нақты нәтижелерін жан-жақты таныстырды. Әдістемелік еңбекте орталықтың қызметін тиімді ұйымдастыру жолдары, демонстрациялық емтихандарды WorldSkills халықаралық стандарттарына сай өткізу, CIS жүйесі арқылы әділ бағалау, сондай-ақ студенттердің кәсіби және кәсіпкерлік қабілеттерін дамыту тәсілдері кеңінен қамтылған.
Аталған білім ордасында он жылдан астам уақыт бойы оқу-өндірістік жұмысқа жетекшілік етіп келе жатқан білікті маманның педагогикалық еңбек жолы 20 жылдан асады.
Бұл жеңіс — колледж ұжымының жүйелі еңбегінің, заманауи білім беру үрдісін табысты енгізу мен студенттердің кәсіби шеберлігін арттырудағы нақты нәтижелерінің айқын көрінісі.