Алматы телекоммуникация және машина жасау колледжінде дуалды білім беру жүйесі бойынша білім алушылардың саны бүгінде 560-қа жетіп отыр.
Колледж мектеп оқушыларына жұмысшы мамандығын насихаттау мақсатында кәсіби бағдар беру жұмысын жаңа форматқа көшіруді бастады. Демек, бұл өндірістік оқыту кезінде алғашқы күннен бастап тәлімгердің бақылауымен жұмыс дағдысы қалыптасқан білікті маман даярлауға бағытталған жұмыс өз деңгейінде ұйымдастырылып жатқанын байқатса керек. Болашақтың негізгі құрылысшысы – жұмысшы мамандығын насихаттау арқылы аянбай еңбек етіп, еліміздің инфрақұрылымының дамуын қамтамасыз етіп жүрген ұстаздар еңбегін дәріптеу – біздің алдымызда тұрған үлкен міндеттердің бірі.
Мектеп бітіруші түлектердің болашақ мамандығын таңдап, толықтай зерделеуі үшін кәсіпорындарға экскурсиялар жасап, өзін маман ретінде сезінуіне ықпал ету маңызды. Алматы қаласының «Қазпошта» акционерлік қоғамында өткізіліп келе жатқан «Дублер күні» іс-шарасына қатысқан оқушының пошта саласына деген қызығушылығы оянары сөзсіз, ол сала қызметінің қыр-сырын түсініп, түйсініп, болашақ мамандығын таңдауға мүмкіндік алады.
Колледж ұжымының еліміздегі пошта байланысы саласының дамуына қосқан үлесі зор. Қазіргі таңда «Радиотехника, электроника және телекоммуникация» мамандығы бойынша ғаламтор тарту үшін қолданылатын талшықты оптикалық кабельді дәнекерлеу бағдары тікелей серіктесіміз – «Қазақтелеком» акционерлік қоғамы тарапынан жоғары бағаға ие. Аталмыш мамандық цифрлық трансформацияға бағытталған экономиканың барлық саласында жоғары сұранысқа ие.
Жастар үшін үлкен мүмкіндік
Жақында кәсіптік-техникалық білім беру жүйесін трансформациялау мақсатында 16 инженерлік-педагогикалық кадрымыз Германия, Оңтүстік Корея, Қытай, Бразилия мемлекеттерінде болып, тағылымдамадан өтіп қайтты. Олар әлемдік деңгейдегі ғылым мен техника саласында болып жатқан жаңа технологияларды игеріп, өз білімдерін жетілдіріп келді. Қазір сол тәжірибені өздерінің бағдарламаларына енгізіп, оқу процесінде қолданып жатыр.
Өткен жылы Алматы қаласы әкімшілігі мен Білім басқармасы көрсеткен қолдаудың арқасында 80 жылдан астам тарихы бар колледждің ескі ғимараты толықтай сүріліп, орнына жаңа ғимарат бой көтерген еді. Сәтін салса, болашақ жұмысшы мамандықтары өкілдері материалдық-техникалық базамен жабдықталған жаңа оқу кабинеттері, шеберханалары мен жатақханасы бар заманауи білім ордасында оқитын болады. Бұл – мемлекетіміздің жастар үшін жасап отырған үлкен мүмкіндіктерінің бірі.