2023 жылдан бастап "бір терезе" қағидасы бойынша Қазақстан елшіліктері арқылы қандас мәртебесін беру механизмі енгізілді.
Еңбек министрлігі бес айда келген қандастардың санын атады, деп хабарлайды Almaty-akshamy.kz Еңбек және халықты әлеуметтік қорғау министрлігіне сілтеме жасап.
"2024 жылдың 1 маусымындағы жағдай бойынша 7 353 этникалық қазақ тарихи отанына оралды. Жалпы 1991 жылдан бері барлығы 1 миллион 135,7 мың этникалық қазақ елге оралды", - делінген хабарламада.
Сондай-ақ министрлік этникалық қазақтардың республикаға оралуына қатысты бірнеше дерек ұсынды.
Жыл басынан бері Қазақстанға келген қандастардың
49,4%-ы Қытайдан,
6,3%-ы – Түрікменстаннан,
5,4%-ы - Моңғолиядан,
34,4%-ы - Өзбекстаннан,
3,2%-ы - Ресейден,
1,3%-ы басқа елдерден келген.
Еңбек министрлігінің мәліметі бойынша еңбекке қабілетті жастағы қандастардың саны 59,1%-ды, кәмелетке толмағандар 31,2%-ды және зейнеткерлер 9,7%-ды құрайды.
"Білім деңгейі бойынша еңбекке жарамды қандастардың 16,9%-ы жоғары, 22,6%-ы орта арнаулы, 55,3%-ы жалпы орта білімі бар, 5,2%-ының білімі жоқ", - делінген хабарламада.