Танымал журналист, велошабандоз Ернат Рахметолла Абай Құнанбайұлының 180 жылдығына орай АҚШ-та велошеру өткізуге бел буғанын айтты, - деп хабарлайды Аqshamnews.kz тілшісі.
Бұл туралы ол әлеуметтік желідегі парақшасында бөлісті.
"Кезекті велошеруімді АҚШ-та өткізуге белді бекем будым. Көрмеген ел, жүрмеген жер. “Келе қал, дәмді тағам мен жайлы төсегің дайын” деп күтіп отырған ешкімім де жоқ. АҚШ-ты аузын айға білеген әлемдегі ең алпауыт, экономика және әскери жағынан №1 ел екенін білеміз. Көлік, пойыз, ұшақ емес, белесебетпен аралаудың қызығы өз алдына. Көбірек көресің, жақынырақ танисың. Әрине қиындығы да болады. Оларды шеше білу, төзе білу – Абай атам айтпақшы, жылы жүрек, нұрлы ақыл, ыстық қайрат, мінезді қажет етері сөзсіз", - деді ол.
Журналист АҚШ-тағы “Абай велошеруінен” күнделік жазып, бөлісіп отыратынын айтты.
Айта кетейік, биыл ұлы Абайдың 180 жыл мерейтойы атап өтіледі. Ол 1845 жылы 10 тамызда Шығыс Қазақстан облысы (бұрынғы Семей уезі) Абай ауданында (бұрынғы Шыңғыстау облысы) Шыңғыс тауының бауырында дүниеге келді.
Абай атақты Тобықты руының Ырғызбай деген тобынан тарайды. Ол ауыл молдасынан оқып жүрген кішкентай кезінен-ақ зеректігімен көзге түседі. Кейін ол Семей қаласында 3 жылдық медресе тәрбиесін алады.
Абай көпті көрген әжесі Зеренің тәрбиесінде болды. Шешесі Ұлжан да ақылды ананың бірі болған. Әкесі Құнанбай Өскенбайұлы орта жасқа келгенде атқа мініп, ел билеу жұмысына араласқан заманы, Ресей патшалығының Қазақстанның батысы мен орталық аймағын отарлап, ел билеу жүйесін өз тәртібіне көндіре бастаған кез.
