Алматы қаласы Жастар саясаты басқармасының қолдауымен Жетісу ауданында бос жұмыс орындарының жәрмеңкесі өтті.
Бұл — мегаполистегі үздік компаниялардың өзіндегі бос жұмыс орындарын ұсынып, ынталы жастармен тікелей жүздесіп, диалог орната алатын маңызды алаң. Іс-шараға IT, қаржы, білім беру және басқа да салалардағы жетекші компаниялардың өкілдері қатысты. Олардың қатарында ірі корпорациялармен бірге болашағы зор стартаптар да бар.
“Айнабұлақ-1” ықшамауданындағы адам аяғы көп жүретін Арбат алаңында өткен жәрмеңкеде жастар өз түйіндемесін тапсырып, HR мамандарымен тікелей әңгімелесу мүмкіндігіне ие болды. Сонымен қатар, жұмысқа орналасуға қатысты пайдалы кеңестер мен бағыт-бағдар беру үшін арнайы ұйымдастырылған консультациялық бұрыштардың алды да бос болмады.
”Бұл — жыл басынан бері қалалық Мансап орталығы ұйымдастырып отырған жетінші жәрмеңке. Бүгінгі іс-шараға қырықтан астам мекеме қатысты. Ең басты мақсат — осы жоба арқылы жұмыс іздеп жүрген жастарға қолдау, жол көрсету, жұмыс табуына көмектесу. Сондай-ақ, осы компаниялар өкілдерінің көмегімен шеберлік сабақтарын, семинар, дәрістер өткізудеміз. Нәтижесі жақсы. Негізі, бос жұмыс орындары жәрмеңкесіне тек жастар қатысады деген шектеу жоқ, жұмыс іздеп жүрген ересектер де келіп қатыса алады”, — дейді Алматы қалалық Мансап орталығының қызметкері Ақарыс Төребеков.