Ақмола облысында техникалық мамандарға сұраныс өсіп, жұмысшы кәсіптердің беделі көтерілуде. «Жұмысшы кәсіптер жылы» аясында гранттар саны артты, студенттер оқу кезінде-ақ тәжірибеден өтіп, жұмысқа орналасуға мүмкіндік алуда.
Көкшетау жоғары техникалық колледжі кадр даярлаудың үлгісіне айналды. Мұнда 20 құзырет орталығы бар, дуальды оқыту жүйесі енгізілген. Студенттер «Тыныс» АҚ, «КАМАЗ Инжиниринг» сияқты кәсіпорындарда тәжірибеден өтеді. Колледж үш деңгейлі білім беруді ұсынады: жұмысшы біліктілігі, техникалық және қолданбалы бакалавриат.
Заманауи жабдықтар – VR, 3D-принтерлер, 1000-нан астам компьютер – жастардың жаңа технологияларды меңгеруіне жол ашып отыр. Студенттер WorldSkills чемпионаттарында жетістікке жетуде, IT-мамандықтарға сұраныс артып келеді.
Кәсіпорындар жас кадрларды белсенді қабылдауда: тәжірибеден өткендердің 80%-ы жұмысқа қалады. Жас мамандардың еңбекақысы, әлеуметтік қолдауы жақсарып, жұмысшы кәсіптер барған сайын тартымды болуда.
