Баласына Кенесары деп есім берген 10 ата-ана 400 мың теңгеден жөргекпұл алады, деп хабарлайды aqshamnews.kz
Бұл сүйіншінің иесі – журналист Нұрсейіт Жылқышыбай.
Шарт бойынша, болашақ Кенесарылар наурыз айында дүниеге келуі керек.
"Достар, алда наурыз айы келе жатыр. Әз- Наурыз. Ұлыстың ұлы күні де жетер. Соған орай "Аламан" компаниясының атынан бір шараны қолға алмақпыз. Ұлына Кенесары деп ат қойған ОН сәбиге 400 мыңнан жөргекпұл береміз.
Ол үшін төменде көрсетілген номердің (8771 236 77 04) вацабына баланың туу туралы куәлігін жіберулеріңіз керек. Баласына Кенесары деп ат қоятын ықыласты адамдар көп болуы мүмкін. Сондықтан алғашқы он адамға сыйақы беріледі. Болашақ Кенесарылар наурыз айында дүниеге келуі керек. Осындай қарапайым шарт.
Енді Кенесары деген есімге келсек. Бұл есім әр қазақ үшін аяулы һәм ардақты. Азаттық жолында опат болған қаһарман. Орыс империясына қарсы тұрған батыр. Орыстың зеңбірегіне кылышпен шапқан қасқыр жүректі Ер. Еркін өмір үшін жанын қиған асыл ердің есімін жаңғыртайық. Біздің ниет осы", деп жазды журналист ФБ парақшасына.
Нұрсейіт Жылқышыбай бұрын да осындай бастама көтеріп, Құнанбай есімді сәбилерге берген уәдесінде тұрған еді.