9 қаңтарда Қазақстанның бірнеше өңірінде ауа райы күрт құбылып, "Қазгидромет" тұман, көктайғақ, жаяу бұрқасын және қатты желге байланысты дауылды ескерту жариялады, деп хабарлайды Аqshamnews.kz тілшісі.
Атырау облысында тұман түсіп, жол көктайғақтануы мүмкін. Әсіресе батысы мен оңтүстігінде жел күшейіп, екпіні 15–20 м/с-қа дейін жетеді. Атырау қаласында түнгі және таңғы уақытта жолдың тайғақ болуы ықтимал.
Павлодар облысының солтүстігі мен шығысында, сондай-ақ Қарағанды және Ұлытау облыстарының бірқатар аумағында тұман түсіп, көріну қашықтығы төмендейді. Жезқазған мен Қарағандыда да осындай ахуал сақталады.
Түркістан облысының батысы, солтүстігі, оңтүстігі және таулы өңірлерінде тұман күтіледі. Шымкент пен Түркістан қалаларында да кей уақыттарда көріну қиындайды.
Алматы және Жетісу облыстарының таулы аудандарында, сондай-ақ Алакөл маңында жел күшейіп, екпіні 15–20 м/с-қа дейін жетуі мүмкін.
Батыс Қазақстан облысында көктайғақ пен қою тұман болжанады. Орал қаласында түнде және таңертең аса сақ болған жөн.
Ақмола, Қостанай, Ақтөбе, Абай және Қызылорда облыстарының кей бөліктерінде тұман күтіледі. Кей өңірлерде жел екпіні 15–20 м/с-қа дейін күшеюі ықтимал.
Солтүстік Қазақстан облысының солтүстігінде аздаған қар жауып, жаяу бұрқасын соғады. Петропавлда түнгі уақытта қар мен жел қозғалысты қиындатуы мүмкін.
Маңғыстау облысында да көктайғақ пен тұман қатар күтіледі. Ақтауда және облыстың жекелеген аумақтарында күндіз жел екпіні 20 м/с-қа дейін жетуі ықтимал.
Синоптиктер жүргізушілер мен жаяу жүргіншілерді сақтық шараларын күшейтуге, ал алыс жолға шығатын азаматтарды алдын ала қауіпсіздік жоспарын қарастыруға шақырды.