ІІМ мектептерде жол қозғалысы ережелері бойынша міндетті сабақтар енгізуді ұсынды, деп хабарлайды aqshamnews.kz
Қазақстан Ішкі істер министрлігінің Әкімшілік полиция комитетінің төрағасы Қайсар Сұлтанбаев елдегі жол-көлік апаттарынан болатын өлім-жітімді қалай азайтуға болатынын айтып берді. Оның айтуынша, Қазақстанда басқа елдермен салыстырғанда балаларға жол қозғалысы ережелері жеткілікті үйретілмейді.
«Ішкі істер министрлігі мектеп бағдарламаларында жол ережелері бойынша сабақтарды жеке міндетті пән ретінде енгізуді ұсынады. Мұндай сабақтар арқылы жолдарда заңға бағынатын мінез-құлық нормаларын сіңіріп, өзі жүргізуші болған кезге дейін есейген сайын жол қауіпсіздігіне жағымды әсер етеді», - деді спикер.
ӘПК басшысы жыл басынан бері жол-көлік апаттарында 176 бала қаза болғанын хабарлады.
"Зардап шеккен балалардың жартысынан астамы жолаушы ретінде қайтыс болған. Қалғаны – жаяу жүргінші, велосипедші, самокат және мопед жүргізушісі. Көп жағдайда қаза болған балалар ересектер тарапынан тасымалдау кезінде көлік ішінде балаға арналған қауіпсіздік құрылғыларын немесе қауіпсіздік белдіктерін қолданбаған", дейді Қайсар Сұлтанбаев.