Алматы облысында жантүршігерлік жол апаты жеті адамның өмірін жалмады. Қаза тапқандар қатарында есту қабілеті төмен спортшылар бар. Олар Бішкектегі турнирден қайтып келе жатқан, - деп хабарлайды aqshamnews.kz тілшісі "КТК" телеарнасына сілтеме жасап.
"Бұл Қазақстандағы есту қабілеті төмен спортшылар қауымдастығы үшін өте ауыр жағдай. Өйткені көлікте жастар құрамасының бас бапкері де болған. Бәрі де ұлттық құраманың мүшелері еді. Олар Азия чемпионаттарында жүлделі орындар алған тәжірибелі спортшылар болатын", - деді Ұлттық сурдлимпиада комитетінің вице-президенті Арсен Шакуов.
Қайғылы оқиға кеше түн ортасында болды. Жолаушыға лық толы минивэн тізгіндеген жүргізуші жүйткіп келе жатып тежеуішін басып үлгермеген. Сөйтіп алдында келе жатқан жүк көлігінің тіркемесіне соғылады. Соққының қатты болғаны соншалық, жеңіл машинаның сау-тамтығы қалмапты. Көлік жүргізушісі мен алты жолаушы оқиға орнында тіл тартпай кетті. Марқұм болған спортшылар Бішкекте өткен ардагер футболшылар арасындағы турнирге қатысқан екен. Полиция жол апатына қатысты қылмыстық іс қозғап, тергеу жүргізіп жатыр.
"Полиция қызметкерлері Алматы - Бішкек автожолының 129-шақырымында болған жол-көлік оқиғасы дерегі бойынша қылмыстық іс қозғады. Қазір болған оқиғаның барлық мән-жайын анықтауға бағытталған соталды тергеу амалдары жүргізілді", - деді Алматы облысы ПД бөлім басшысы Ернар Сайділдин.
