Аудан әкімі Ләззат Жылқыбаева Өңірлік коммуникациялар қызметінің алаңында Мемлекет басшысының сыртқы жарықтандырумен 100% қамтуды қамтамасыз ету жөніндегі тапсырмасының орындалу барысын баяндады.
Әкімнің айтуынша, ауданның басым бағытының бірі – көшені үздіксіз әрі сапалы жарықтандыруды қамтамасыз ету. Жыл басынан бері ауданда жарық болмаған 76 жерге жарық беріліп, жылдың соңына дейін тағы осындай 13 жерді жарықтандыру жоспарланып отыр.
Сыртқы жарықтандыруды жаңғырту аясында 56 дана ШУНО ауыстырылды, 4340 жарық шамы жаңартылды, 166 тірек орнатылып, аудан аумағында 47 шақырымнан астам кабель желісі тартылды.
Бұдан бөлек, сыртқы жарықтандыру құрылысына қатысты екі үлкен жоба әзірленіп жатыр. Бұл жобалар 33 көшенің көлік жолдары мен 11 тротуарды, сондай-ақ саябақ аймақтарын жарықтандыруды көздейді. Осы жобаның аясында 66 шақырымнан астам кабель желісін ауыстырып, 824 жарық тірегін қойып, 1300 шам орнатып, 2900 торшер қою жоспарланған.
Жоба аяқталу сатысында. Құрылыс-монтаж жұмыстары 2026 жылдың II тоқсанына жоспарланған.
Ғимараттардың қасбетін сәулеттік жарықтандыруға да ерекше көңіл бөлінген. Қазіргі уақытта 30 нысанда, соның ішінде 21 көппәтерлі тұрғын үй мен 9 әкімшілік ғимаратта жарықтандыру жұмыстары жүргізіліп жатыр. 9 ғимараттағы жұмыс аяқталған, тағы 12-сінде межеге жетіп қалды жұмыс.
«Біздің мақсатымыз – ауданда жарық пен қауіпсіздікті арттыру ғана емес, сонымен қатар Алматының көшелері мен ғимараттарына да заманға сай әрі эстетикалық келбет беру», – деп атап өтті Ләззат Жылқыбаева.