Әлемдік деңгейдегі ең беделді арнайы жасақ сайыстарының бірі – UAE SWAT Challenge турнирінің үшінші күні Қазақстан үшін тарихи жетістіктермен есте қалды. 48 елден келген 109 команданың ішінен барлық үш жүлделі орынның қазақстандық командаларға бұйыруы – ел спорты мен арнайы құрылымдар үшін зор мақтаныш.
Үшінші күннің басты сенсациясы – “Kazakhstan A” командасының “Офицерді құтқару” кезеңін рекордтық 02:00 минутта орындауы болды. Бұл нәтиже команданы турнир кестесінің ең жоғары сатысына көтерді.
Екінші орынды “Kazakhstan B”, ал үшінші кезеңнің қола жүлдесін “Kazakhstan C” командасы иеленді.
Қазақстандық командалардың табысы мұнымен шектелмейді. Тағы екі командамыз үздік 20-лықтың қатарында:
- “Kazakhstan D” – 19-орында
- “Tomiris” қыздар командасы – әйелдер арасындағы үздік нәтижесін тағы бір мәрте дәлелдеп, көптеген ерлер командаларынан озып шықты
Үш кезеңнің қорытындысы бойынша “Kazakhstan C” жалпы есепте бірінші орынды берік ұстап тұр. Оны өкшелеп “Kazakhstan A” командасы екінші орынға жайғасты. Бұл – қазақстандық арнайы жасақтың тұрақтылығы мен жоғары дайындығының айқын дәлелі.
Осылайша, Қазақстан командалары әлемнің ең мықты арнайы бөлімшелері жиналған элиталық турнирде айқын басымдықпен алда келеді. Алда тағы екі шешуші кезең бар. Ел жанкүйерлері батырларымызға сенім артып, әлемдік додадан жеңіспен оралады деп үміттенеді.