Желтоқсан оқиғасы – Тәуелсіздіктің алтын тұғыры. Ата-бабалар аңсаған азаттықтың шырағы жағылған сәт. Осынау тарихи оқиғаның куәгерлері – Алмалы ауданы «Желтоқсан ақиқаты» патриоттық қозғалысының төрайымы Гүлмира Шанигбаева мен орынбасары Ғани Қалмақбаев ҚазҰҚПУ құрамындағы Кәсіби білім беру колледжі студенттерімен кездесті.
Олар «Желтоқсанның мұзға жанған алауы...» тақырыбында өткен тәрбие сағатында жастарға тағлымды әңгімелер айтты. Иә, сонау 1986 жылғы Желтоқсан оқиғасы ел жадында әлі күнге жаңғырып тұр. Кеңестік жүйеге қарсы тұрған Желтоқсан көтерілісіндегі қазақ жастарының отансүйгіштік сезімін кейінгі ұрпаққа насихаттай отырып, сол кездегі құрбандарды мәңгі есте сақтау, тәуелсіздік бастауы ызғарлы Желтоқсан оқиғасы екенін жете түсіндіру, сол арқылы жас ұрпақ бойына еліне, жеріне, ұлтына деген патриоттық сезімнің дәнін себу.
Аталған іс-шарада алдымен еліміздің Гимні орындалды. Желтоқсаншы Ғани Мүтәліпұлы – сол кездегі алпауыт елдің айбарынан сескенбей, өз елінің намысын қорғап, бойында ұлттық рухы аспандаған қазақтың өрімдей қыз-жігіттерімен бірге орталық алаңға шыққан азамат. «Қанша жыл өтсе де Желтоқсан жүректе жазылмаған жара, тарихта қасіретті күн болып қалғаны рас. Бірақ осы оқиғаның қалай болғаны туралы өскелең ұрпақ білуі керек. Өйткені осы оқиғаға біреудің әкесі, анасы, біреудің баласы қатысты. Қазақ жастары сол сәтте көшеге шығып, үн қатты. Ел тәуелсіздігін талап етті. Елмен санаспай істелген іске, шығарған шешімге халық наразы екендіктерін көрсетті. Бұл тарихтағы тағы бір сабақ болды. Сондықтан бұл қазақ халқының ойы, мұңы болып басталды да арты үлкен өзгеріске әкелген болатын», – деді ол.
Сонымен қатар, Гүлмира Белғожақызы өз ойын жеткізді. «Біріміз бұл күнді Тәуелсіздік мерекесі десек, екіншіміз тәуелсіздікке қол жеткізуге қадам жасаған қаралы күндердің бірі деймін...
Шынын айту керек, желтоқсан бір жағынан қаралы күн. Қаншама жалынды жастың өмірі қиылды. Мереке деп те айта алмаймын, бірақ Тәуелсіздік бастауы дегенді қолдаймын. Бірақ бұл күні осындай тәрбиелік маңызы бар кездесулер, тарихи сәтке негізделген кинолар қойып, патриоттық әндер орындалғаны дұрыс. Әр заманның жастары сол уақыттың талабына сай тәрбиеленеді. Десек те, жастардан үлкен үміт күтеміз. Бүгінгі жастар қазақтың басты байлығы тәуелсіздік екенін шынайы сезінсе, бабалар мұратының орындалғаны болар еді», – деді ол.
Бұл іс-шарада патриоттық әндер айтылып, өлеңдер оқылды. Қазақ елінің өткені мен бүгінін бейнелейтін бейнероликтер көрсетіліп, ұстаздар қауымы мен колледж директоры А.Қарабаева Желтоқсан оқиғасының маңызы туралы айтып, өз пікірлерін білдірді, жастарды елім деген ел азаматтарын құрметтеуге шақырды. Іс-шара соңында Ә.Тінәлиевтің «Желтоқсан желі» әнін қыздар хормен орындады.
Топ жетекшісі Нұргүл Абдраманқызы желтоқсандық жастар ұмытылмай, ерліктері есте мәңгілік сақталатындығын айтып, меймандарға алғыс білдірді.