Алматыда өткен Қазақстан Жазушылар одағының 90 жылдық мерейтойына алыс-жақын шетелден келген әдебиет қайраткерлері қатысып, өз құттықтауларын жеткізді, деп хабарлайды aqshamnews.kz.
ТҮРКСОЙ түркітілдес мәдениеті ұйымының бас хатшысы Сұлтан Раев:
«Жазушылар одағының 90 жылдық мерейтойы – тек қазақ әдебиетінің ғана емес, бүкіл түркі әлемінің ортақ жетістігі. Әдебиет – халықтар арасындағы рухани көпір, ал Қазақстан Жазушылар одағы сол көпірді мықтап ұстап, түркі халықтарының бірлігін нығайтып келеді», - деді.Қырғыз Жазушылар одағының төрағасы Қаныбек Иманалиев:
«Қазақ жазба әдебиеті Абайдан бастау алып, Мұхтар Әуезовтің «Абай жолы» сынды мәңгілік мұраларымен әлем әдебиетінің қазынасын байытты. Қазақ әдебиеті – түркі әлемінің рухани мақтанышы», - екенін айтты.Татарстан Жазушылар одағының төрағасы Ркаил Зайдуллин:
«Қазақ пен татар әдебиетінің байланысы ежелден тығыз. Бізді ортақ тарихымыз ғана емес, бауырлас әдебиетіміздің бірлігі де байланыстырады. Әдебиетіміздің бұл байланысы болашақта да сақталып, нығая беретініне сенеміз», - деді.
Бұл мерейтой қазақ әдебиетінің тек ұлттық деңгейде ғана емес, халықаралық аренада да жоғары бағаланғанын тағы бір мәрте дәлелдеді.