Солтүстік Қазақстан облысында Мемлекет басшысы жариялаған «Таза Қазақстан» экологиялық акциясы аясында «Балық аулау торлары теңізі. 1-бөлім» деректі фильмінің экокөрсетілімі өтті. Іс-шараны облыстық Жастар ресурстық орталығы еріктілердің фронт-офисімен бірлесіп ұйымдастырды.
Кинокөрсетілімнің мақсаты – жастардың экологиялық сауаттылығын арттыру, су айдындарының ластануы мен антропогендік әсердің салдарына назар аударту. Фильм Каспий теңізінің экологиялық мәселелерін көтеріп, табиғатты қорғауда әр адамның жауапкершілігі маңызды екенін көрсетеді.
«Визуалды өнер мен ашық диалог арқылы табиғатқа жауапты көзқарас қалыптастыру – басты мақсатымыз. Мұндай фильмдер тек ақпарат бермей, нақты әрекетке шабыт береді», – деді СҚО еріктілер фронт-офисінің үйлестірушісі Ғаббас Алмагүл.
Көрсетілімнен кейін студенттер мен еріктілер «сұрақ–жауап» форматында қалдықтарды сұрыптау, пластикті қайта өңдеу, жергілікті эко-бастамаларға қатысу мәселелерін талқылады. Қатысушылар жеке экологиялық ізді азайту жолдары мен өңірдегі табиғатты қорғау шаралары туралы сұрақтар қойды.
Студент Динара Тайманова: «Фильмді көрген соң әрі мұңайдым, әрі шабыттандым. Ластанудың ауқымы қорқынышты. Бірақ тазалыққа шығу сияқты шағын қадамдар да біреудің өмірін сақтап қалуы мүмкін екенін түсіндім», – деді.
Ұйымдастырушылар визуалды формат жастарға экологиялық сын-қатерлерді жақсырақ түсінуге көмектесетінін атап өтті. Мұндай кездесулерден кейін еріктілер қатары артып, жастар өз эко-бастамаларын ұсынуға белсенді кіріседі.
«Біз үшін «жасыл кинотеатр» тұрақты дәстүрге айналуы маңызды. Ағарту, тарту және нақты әрекет арқылы ғана қоршаған ортаны бірге тазарта аламыз», – деп түйіндеді Ғаббас Алмагүл.