Ұлттық ұланның 5574 әскери бөлімінің жауынгерлік және әдістемелік дайындық орталығында «Жас бүркіт» спорттық-әскери патриоттық клубының оқушылары арасында алғаш рет далалық әскери оқу-жатығуы өтуде.
Жиынға Алматы қаласындағы мектептерден «Жас бүркіт» спорттық-әскери патриоттық клубына мүше 50-ден аса бала мен жасөспірім қатысуда.
Әскери іс-шараның мақсаты – өсіп келе жатқан жас буын мен әскерге дейінгі жастарға Отанымыздың тарихын оқыту негізінде, қазақстандық патриотизм рухында тәрбиелеу, әскери қызметтің беделін және Қазақстан Республикасы Ұлттық ұланының мәртебесін арттыру, әскери істі меңгеру және жастарды әскери қызметке физикалық дайындау. Сондай-ақ, балалардың, жасөспірімдердің және әскерге дейінгі жастардың моральдық бірлігін, әскери-патриоттық, спорттық және әскери-техникалық дайындықтарын шыңдау.
Болашақ сарбаздар үш топқа бөлініп, бір аптадан бері күн тәртібіне сәйкес саптық дайындық, алғашқы медициналық көмек, топография, альпинизм, суда жүзу және спорттық дайындық пәндерінен білімдерін шыңдап, әскери өмірдің қыр-сырымен танысуда. Қуанарлығы, алматылық жасөспірімдер бұл оқу-жаттығу іс-шарасына аса қызығушылықпен қатысып, белсенділік танытуда. Әскери өмірге бір табан жақын болғандарына мәз болған балалар осындай мүмкіндік жасаған үлкендерге алғыс айтуда.