Алматы қаласының терроризмге қарсы жедел штабы азаматтарға әуежайда, әсіресе ұшу алдындағы тексеру рәсімдері мен ұшаққа отырғызу кезінде орынсыз әзілдер мен айтылымдардың жол берілмейтінін ескертеді.
Жуырда Алматы халықаралық әуежайында оқыс оқиға орын алды, деп хабарлайды aqshamnews.kz.
Жасөспірімдердің бірі қалжыңдап, досының рюкзагында жарылғыш зат бар деп мәлімдеген. Нәтижесінде ұшақ пен барлық жолаушыларды тексеру жоспары іске қосылып, рейс кешіктіріліп, уақытша ұшу шектеулері енгізілді.
Мұндай сөздер, тіпті қалжың ретінде айтылған күннің өзінде, қауіпсіздікке төнген ықтимал қатер ретінде қабылданып, міндетті түрде тексеріледі, ал кейбір жағдайларда — Қазақстан Республикасының заңнамасына сәйкес жауапкершілікке әкеп соғуы мүмкін.
Азаматтарды жауапкершілік танытып, тексеру аймағында және ұшақ бортында қауіп-қатер, қару-жарақ, жарылғыш заттар және басқа да қауіпті тақырыптарға қатысты сөздер мен тіркестерді қолданудан бас тартуға шақырамыз.
Мұндай «әзілдер» орынсыз және салдары өте ауыр болуы мүмкін.
Осыны өсіп келе жатқан жас ұрпаққа түсіндіру керек және халық көп жиналатын орындарда мінез-құлықты басқара білген жөн.