Жамбыл облысының әкімі Ербол Қарашөкеевтің баспасөз хатшысы Жанғазы Ахмет әлеуметтік желіде қызу талқы мен әзілге айналған өңір басшысының фотосына қатысты пікір білдірді.
Қарашөкеев Instagram-дағы парақшасында 2025 жылды Жамбыл облысында "Кітап оқу жылы" деп белгілегені туралы жазбасын жариялады, деп хабарлайды aqshamnews.kz.
Онда Жамбыл облысының әкімі Ербол Қарашөкеев Жаңа жылдағы 4 күн демалыста не бітіргенін жазған.
"Кітап – рухани азық, жанымыздың шуағы, болашағымыздың бағдары. Биыл, 2025 жылды Жамбыл облысында «Кітап оқу жылы» деп белгілеу – осы құндылықтарды жаңғыртуға бағытталған қадам. Жаңа жылдық демалыста мен де уақыт тауып, халқымыздың мақтанышына айналған қабырғалы қаламгер Шерхан Мұртазаның «Ай мен Айша» романын және поэзияның ақ гүлі атанған Күләш Ахметованың «Құт» атты өлеңдер жинағын қайта оқып шықтым", - дейді Ербол Қарашөкеев.