Жекпе-жек 5 қарашада Германияның Оберхаузен қаласында өтеді
Universum Boxing промоутерлік компаниясы ауыр салмақтағы қазақстандық боксшы Жан Кособуцкий (18-0, 17 КО) мен Германия өкілі Хусейн Мұхамед (17-0, 14 КО) арасындағы жекпе-жекті ресми түрде жариялады, деп хабарлайды Almaty-akshamy.kz ҚазАқпаратқа сілтеме жасап.
Sports.kz сайтының мәліметінше, жекпе-жек 5 қарашада Германияның Оберхаузен қаласында өтеді.
«Жан Кособуцкий оппоненті Хусейн Мұхамедке қарсы жекпе-жекте өзіне тиесілі WBC International титулын қорғайды. Бұл Кличкодан кейінгі Германияда өтетін ауыр салмақтағы ең ірі жекпе-жек. Жеңімпаз әлем чемпионы атағы үшін күресу мүмкіндігіне ие болады», - деп жазды промоушен Instagram-парақшасында.
Жан Кособуцкий бұған дейінгі соңғы жекпе-жегін мамырдың 21-інен 22-сіне қараған түні Гамбургте (Германия) өткізді. Онда ол француздық Жоан Дюопаны (39-7, 26 КО) мерзімінен бұрын жеңді.