Жамбыл облысында «Казфосфат» ЖШС құрамына кіретін кәсіпорындарда аз уақыт ішінде екі ауыр өндірістік оқиға тіркеліп, соңы адам өлімімен аяқталды, деп хабарлайды Aqshamnews.kz тілшісі.
Алғашқы оқиға 29 қаңтарда Новоджамбул фосфор зауытында болған. Цех №5 аумағында технологиялық жұмыстар кезінде пештен ыстық шлак атқылап, үш жұмысшы күйік шалған. Зардап шеккендердің бірі – 1994 жылы туған оператор денесінің 45%-ын қамтыған ауыр термохимиялық күйік алып, жансақтау бөліміне жеткізілгенімен, бірнеше күннен кейін көз жұмды. Ал 1983 және 2003 жылы туған екі қызметкер күйік бөлімінде ем қабылдап жатыр, жағдайы орташа ауыр деп бағаланған.
Бұдан кейін «Казфосфатқа» қарасты минералды тыңайтқыштар зауытында да қайғылы жағдай болды. Кәсіпорын аумағында жүк көлігінің жүргізушісі БелАЗ жүк көлігінің астында қалып, оқиға орнында қаза тапқан. Алдын ала дерек бойынша, 1992 жылы туған жүргізуші көліктің бортына жүк байлау кезінде артқа қозғалған ауыр техниканың астында қалған.
Кәсіпорын әзірге оқиғаларға қатысты ресми мәлімдеме жасаған жоқ. Қатарынан болған бұл жағдайлар өндірістегі еңбек қауіпсіздігі талаптарының сақталуы мәселесін қайта көтерді.