АЭС салуды қолдау жөніндегі Халықтық штаб мүшелері Жамбыл облысына келіп, атом энергетикасының болашағы мен оның мемлекетке пайдасын тұрғындармен талқылады, деп хабарлайды aqshamnews.kz
Тараз қаласында штаб мүшелері өңірдің педагогтарымен кездесу өткізді, оған 350-ден астам адам қатысты. Штаб мүшелері Мемлекет басшысының білім беру мен мұғалімдерге ерекше көңіл бөлетінін атап өтті. "Педагог мәртебесі туралы" заң қабылданып, ұстаздардың жалақысы мен әлеуметтік қамсыздандырылуы артқанын, білім беру инфрақұрылымы жақсарып, "Жайлы мектептер" салынуда екенін тілге тиек етті. Сондықтан ұстаздар қауымының АЭС тақырыбына қатысты толық ақпарат алып, бейбіт атомның артықшылықтарын түсінуі аса маңызды деп атап өтті.
Мәжіліс Спикері, «AMANAT» партиясының Төрағасы Ерлан Қошанов атом электр станциясы елімізге энергетикалық тәуелсіздікке қол жеткізетін болашақтың жобасы екенін айтты. Ол АЭС салу мүмкіндігін жіберіп алмау керектігін ерекше атап өтті.
– Референдумға дейін аз уақыт қалды. Мұнда облыстың үздік ұстаздары жиналып отыр. Сіздердің беделдеріңіз жоғары, сөздеріңіз өтімді. Президенттің реформалары мен бастамаларын әрдайым қолдап келесіздер. Ел болашағы үшін дұрыс таңдау жасау жолында тізе қоса жұмыс істейміз деп сенемін. Баршаңызды АЭС салу жөніндегі бастаманы қолдауға шақырамын, – деді Ерлан Қошанов.