Жамбыл облысы Меркі ауданында 12–17 жас аралығындағы 22 жас спортшы аудандық ауруханаға түсті, деп хабарлайды Аqshamnews.kz тілшісі.
Облыс әкімдігінің баспасөз қызметі ұсынған ресми ақпаратқа сәйкес, оқиға 2026 жылғы 21 қаңтар күні кешкі сағат 22:40 шамасында тіркелген. «Тұран» демалыс орнынан Қызылорда облысынан күрес түрінен оқу-жаттығу жиынына келген кәмелетке толмаған жасөспірімдер Меркі аудандық көпбейінді орталық ауруханасына жеткізілген. Алдын ала диагноз - этиологиясы анықталмаған гастроэнтерит.
Оқиғаның нақты себебін анықтау үшін мамандар балалар орналасқан орталықтағы тамақ өнімдеріне сараптама жүргізген. Қорытындысы әзірге дайын емес.
Әкімдік мәліметінше, бұл деректі Меркі ауданының полициясы тіркеген. Тексеру нәтижесіне қарай тиісті процестік шешім қабылданады.
Сондай-ақ облыс әкімі Ербол Қарашөкеевтің тапсырмасымен оқиға орнына облыс әкімінің орынбасарлары Айжан Есмағамбетова мен Серік Сәлемов барып, жедел штаб отырысын өткізген.
Ресми дерекке сүйенсек, «Тұран» демалыс орнында барлығы 103 жас спортшы және 13 жаттықтырушы қоныстанған. Ауруханаға жүгінгендердің жағдайы жеңіл дәрежеде, денсаулығы тұрақты, дәрігерлердің бақылауында.