WhatsApp мессенджерінде белгісіз біреулер ұлын ұрламақ болғаны туралы айтқан әйелдің аудиохабарламасы тарап жатыр. Осыған қатысты ҚР Ішкі істер министрлігі түсінік берді, деп хабарлайды Almaty-akshamy.kz Inform.kz-ке сілтеме жасап.
Бетперде таққан ер адам балаға кәмпит ұсынып, оны ішінде бірнеше кісі отырған қара көлікке отыруға шақырған-мыс. Әйелдің айтуынша, ұлы қаскүнемдерден қашып үлгерген, дегенмен ол полицияға барып, оқиғаның мән-жайын хабарламақ.ҚР ІІМ мәліметінше, бұл ақпарат тексерілді және оның шынайылығы расталған жоқ.
«Полицияға мұндай арыздар түскен жоқ. Сондай-ақ хабарламада әйел осылай әрекет ететін әлдебір банда туралы айтады. Алайда тәртіп сақшыларына педофилдер тобы туралы да хабарланған жоқ. Аулаларды аралап, балаларды ұрлайтын ер адамдар тобы туралы ақпарат та – ескі фейк – деді ведомствоның баспасөз қызметінен.