Кеше АҚШ президенті Дональд Трамп Иранның ядролық үш нысанға, атап айтсақ, Фордо, Натанз және Исфаханға соққы жасаған еді. Салдарынан Иранда бірнеше адам қаза тауып, жарақат алды. Желіде Иранда тұратын қазақ қызының видеосы тарады, - деп хабарлайды aqshamnews.kz тілшісі.
Видео журналист Сырымбек Төлеудің әлеуметтік желідегі парақшасында жарияланды. Онда қыз Иранның Каспий теңізіне жақын қаласында тұратынын және онда жағдай тұрақты екенін айтады.
"Иранда 3 күн интернет өшірулі болды. Қазір ғана қосты. Ешкімге хабарласа алмай, біраз қиналып қалдық. Мұны банктерге хакерлер жұмыс істетпей жатыр екен, бұдан басқа халық дүрлікпесін деп түсіндірді. Біздің қала Каспийге жақын болған соң тыныш. Басқа үлкен қалалардан бізге келіп жатыр. Халық көбейіп кетті. Ешкім үйден шығып жатқан жоқ. Уайымдамаңыздар, бізде бәрі жақсы", - деді ол.
Еске салайық, 22 маусымға қараған түні АҚШ Иранға қарсы операция жасады. АҚШ президенті Дональд Трамп АҚШ әуе күштері Фордо, Натанзе және Исфаханның ядролық қондырғыларына соққы жасағанын хабарлады. Пентагон басшысы Пит Хегсет Иранның ядролық бағдарламасы жойылғанын мәлімдеді.
Ал бұған дейін Иран Израильге қарсы зымыран соққыларын жіберген еді. Оған қоса Петах-Тиква және Тель-Авив қалалаларындағы көпқабатты ғимараттарға зымыран соққысы жасалғаны айтылды.