Кездесуде ұйымның күш әлеуетін жетілдіру мәселесі талқыланды
Ұжымдық қауіпсіздік шарты ұйымының (ҰҚШҰ) Бас хатшысы Иманғали Тасмағамбетов Ресей Федерациясының Қорғаныс министрі, генерал Сергей Шойгумен кездесті, деп хабарлайды Almaty-akshamy.kz Zakon.kz-ке сілтеме жасап.
ҰҚШҰ сайты таратқан мәліметте Шойгу Тасмағамбетовті жаңа қызметімен (2023 жылы 1 қаңтардан бастап үш жыл мерзімге) құттықтағаны айтылады.
"Осы маңызды және жауапты лауазымға тағайындалуыңызбен бірден құттықтай кеткім келеді, өйткені біздің ұйымға көп нәрсе байланысты. Мемлекеттік ауқымдағы, ал қазір мемлекетаралық ауқымдағы қайраткер ретіндегі орасан зор тәжірибеңіз, оның ішінде Қазақстанның Қарулы күштерін қалыптастыруға жұмсаған ерен еңбегіңіз, Қорғаныс министрі ретіндегі тәжірибеңізді ескере отырып, өзіңізге үміт артамын", - деді Ресей Федерациясының Қорғаныс министрі Сергей Шойгу.
Кездесу барысында Шойгу мен Тасмағамбетов ұйымның әскери құрамдас бөлігін дамыту, сондай-ақ оның күш әлеуетін жетілдіру мәселелерін талқылады.
Иманғали Тасмағамбетов ҰҚШҰ-ның Бас хатшысы қызметіне 2023 жылдың 1 қаңтарынан бастап кірісті. ҰҚШҰ Бас хатшысы үш жылға тағайындалады. Тасмағамбетовке дейін ҰҚШҰ Бас хатшысы қызметін Станислав Зась атқарды. ҰҚШҰ-ға Ресей, Армения, Беларусь, Қазақстан, Қырғызстан және Тәжікстан кіреді.
2023 жылы 13 ақпанда Минскіде Александр Лукашенко Иманғали Тасмағамбетовпен кездесті.