Алматының тау беткейі мен Іле-Алатауы ұлттық паркінің аумағында орман өртінің алдын алуға бағытталған іс- шаралар жүзеге асып жатыр, – деп хабарлайды aqshamnews.kz тілшісі.
Бұл туралы Өңірлік коммуникациялар қызметінің алаңында орманды қорғау, молықтыру мен қалпына келтіру бөлімінің басшысы Райхан Мұхаметжанова мәлімдеді.
Спикердің айтуынша, осы жолы инфрақұрылымды дайындаудан бастап цифрлық бақылауға дейінгі жұмыстарға көп көңіл бөлініп отыр екен.
Өрт қаупі артатын маусымға дайындық аясында ұлттық паркте ұзындығы 90 шақырым болатын өртке қарсы жолдар жөнделіп, ұзындығы 294 шақырымды құрайтын минералдандырылған жолақтар тазартылып, күтімге алынған.
Сонымен қатар таулы аймақта 22 бақылау мұнарасы қалпына келтіріліп, өртке қарсы аншлагтар жаңартылып, жедел әрекет ету үшін 20 тікұшақ алаңын алдағы маусымға әзірлеуге кіріскен.
«Біз қауіптің салдарымен емес, себебімен күресеміз. Сондықтан профилактикалық жұмысты, техникалық жарақтандыру мен таулы аймақтағы жағдайды бақылауды күшейттік», - дейді Райхан Мұхаметжанова.
Материалдық-техникалық базаға көп көңіл бөлініпті. Орман өртін сөндіретін 4 жаңа станция пайдалануға беріліп, арнаулы жасақтар құрылған, жанармайдан қор жасап, техниканы да жан-жақты қамдап жатыр.
Өртті ерте анықтайтын осы заманғы жүйелерді де қосымша енгізіп жатыр. 15 нүктеде автоматтандырылған бақылау кешендері орнатылып, жедел басқарудың орталықтандырылған жүйесі құрыла бастаған.
Спикердің айтуынша, төтенше қызметтермен бірлесе қимылдап, халықты ақпараттандыру жағы алдын алу жұмысының маңызды бөлігі болып отыр.
«Біз жер пайдаланушылармен және туристермен белсенді жұмыс жүргізіп келеміз, өйткені адам факторы әлі де өрттің негізгі себебінің бірі болып қалып отыр. Жалпы, орман өртінің алдын алу, жедел әрекет ету мен табиғи экожүйені сақтауға қажетті шаруаның бәрін істедік», - деп түйіндеді ол.