Ішкі істер министрлігі 15 наурызда өтетін референдум алдында қазақстандықтарды тек ресми ақпаратқа сенуге және жалған хабарламаларды таратпауға шақырды, деп хабарлайды Aqshamnews.kz тілшісі.
Ведомство мәліметінше, мұндай маңызды кезеңде әлеуметтік желілер мен мессенджерлерде жалған ақпараттар мен әдейі таратылатын арандатушы хабарламалар жиі кездеседі. Олардың негізгі мақсаты – қоғамды адастыру және жағдайды тұрақсыздандыру.
ІІМ өкілдері қазіргі таңда цифрлық технологиялар мен жасанды интеллектінің дамуына байланысты жалған контент жасаудың бұрынғыдан әлдеқайда жеңілдегенін атап өтті. Соның салдарынан шындыққа жанасатындай көрінетін, алайда жұртты жаңылыстыратын материалдар қысқа уақыт ішінде кең таралуы мүмкін.
Министрлік көрінеу жалған ақпарат тарату заң бұзушылық екенін еске салды. Мұндай әрекеттер үшін әкімшілік және қылмыстық жауапкершілік қарастырылған.
Осыған байланысты қазақстандықтарға заң талаптарын сақтап, тексерілмеген ақпаратты таратпау, ақпараттық мәдениетті ұстану жөнінде үндеу жасалды. Сондай-ақ күмәнді хабарламаларды көрген жағдайда оны өзгелерге жібермеу қажеттігі айтылды.
ІІМ референдум кезінде қоғамдық тәртіп пен қауіпсіздікті толық қамтамасыз ететінін мәлімдеді. Ведомствоның хабарлауынша, жалған ақпарат тарату және арандатушылық әрекеттер жедел анықталып, заң аясында қатаң қаралады.
«Сондықтан тек ресми және сенімді ақпарат көздеріне ғана сеніңіздер», – деді ІІМ ресми өкілі Шыңғыс Алекешев.