Азия ойындарында жүлде алған спортшылар мен олардың жаттықтырушыларын ақшалай ынталандыру сыйлығының көлемі белгілі болды. Бұл туралы ҚР Туризм және спорт министрі Ермек Маржықпаев мәлімдеді, деп хабарлайды Almaty-akshamy.kz.
Сонымен, Азия ойындарында чемпион атанған спортшыға 10 000 АҚШ доллары көлемінде ақшалай сыйақы беріледі. Ал, алтын медаль иегерін жарысқа дайындаған жаттықтырушыға 5000 АҚШ доллары қарастырылған. Құрлық біріншілігінің күміс жүлдегері 5000 АҚШ доллары, ал жаттықтырушысы 3000 АҚШ доллары көлемінде сыйақы алмақ. Сондай-ақ, қола медаль еншілеген құрама спортшысына 3000 АҚШ доллары, ал оның жаттықтырушысына 2000 АҚШ доллары көлемінде ақшалай ынталандыру күтіп тұр.
Жарысқа сары құрлықтағы 43 мемлекеттен 4 мыңға жуық спортшы қатысады. Олар спорттың 22 түрінен жалпы саны 564 медаль (паралимпиадалық спорт түрінен - 490 және паралимпиадалық емес спорт түрінен - 74) жиынтығын өзара сарапқа салады.