Соңғы жылдары халықтың табысы біртіндеп өсті
Халықтың табысын арттыру бағдарламасының жұртқа тигізген пайдасы шамалы. Бұл туралы Мемлекет басшысы Қасым-Жомарт Тоқаев Үкіметтің кеңейтілген отырысы барысында айтты, деп хабарлайды Almaty-akshamy.kz.
Кеңейтілген отырыста Президент азаматтардың табысын арттыру және адам капиталын дамыту мәселесіне тоқталды.
«Соңғы жылдары халықтың табысы біртіндеп өсті. Былтыр бұл өсім 5% шамасында болды. Бірақ Алматы, Атырау, Қызылорда, Маңғыстау және Түркістан облыстарында жұрттың табысы орташа республикалық деңгейге жетпейді. Бұл көрсеткіш Алматы және Шымкент қалаларында да төмен. Ал, Қызылорда облысында халықтың табысы тіпті азайып кетті. Биыл мамыр айында азаматтардың нақты табысының көрсеткіші минус 2,9 % болды. Мұндай құлдырау көптен бері болған емес», – деді Қасым-Жомарт Тоқаев.
Сонымен қатар ол азаматтардың табысын арттыру бағдарламасын пайдасыз деп атады.
«Халықтың табысын арттыру бағдарламасы қабылданды. Бірақ оның жұртқа тигізіп жатқан пайдасы шамалы. Ең алдымен, жергілікті жерлерде тиімді жұмыс жүргізілуі керек. Әкімдер жыл сайын әрбір 10 мың тұрғынға 100 жаңа жұмыс орнын ашуға тиіс. Менің білуімше, бұл бағытта нақты нәтиже жоқ. Тағы да ескертемін. Өңір басшыларының жұмысын бағалаған кезде осы көрсеткішке баса мән береміз. Жұмыс орындарын ашу жұрттың әлеуметтік жағдайына тікелей әсер етеді. Экономиканың тұрақты дамуы да осыған байланысты. Сондықтан Үкімет әкімдермен бірлесіп, бұл міндеттің қалай орындалып жатқанын талдауға тиіс», – деп ескертті Мемлекет басшысы.