Алматыда Қазақстанның халық артисі, белгілі композитор Алтынбек Қоразбаев Құрылтай сайлауында дауыс беріп, азаматтық таңдау жасады, – деп хабарлайды aqshamnews.kz тілшісі.
Ұлттық өнердің көрнекті өкілі елдің қоғамдық-саяси өміріндегі маңызды науқанға қатысып, азаматтық ұстанымын білдірді.
Өнер иесі сайлау учаскесіне келіп, ел болашағына қатысты маңызды шешім қабылдауға әр азаматтың үлесі бар екенін атап өтті.
«Қазақ елінде үлкен жаңалық болып жатыр. Халық сайлау учаскелеріне белсенді түрде барып, дауыс беріп жатыр. Депутаттарға артар сенім мол, жақсы жаңалық күтеміз», – деді Алтынбек Қоразбаев.
Композитордың айтуынша, ел өміріндегі осындай маңызды кезеңдерде халықтың белсенділігі айрықша мәнге ие. Өйткені сайлау – азаматтардың таңдау білдіріп қана қоймай, мемлекет дамуының бағытына қатысты жауапкершілігін танытатын қоғамдық маңызды науқан.
Құрылтай сайлауы елдің саяси жүйесінде жаңа өзгерістер қалыптасып жатқан кезеңге тұспа-тұс келіп отыр. Осы ретте әр азаматтың сайлау учаскесіне келіп, таңдау жасауы – ел тағдырына бей-жай қарамауының белгісі.