Ақтөбеде 26 жастағы тұрғын интернет-алаяқтардың құрбаны болып, 7,5 млн теңгесінен айырылды, деп хабарлайды Aqshamnews.kz тілшісі.
Оқиға мереке қарсаңында болған. Жәбірленушіге WhatsApp арқылы белгісіз адам хабарласып, өзін гүл жеткізу қызметінің курьері ретінде таныстырған. Ол тапсырысты растау үшін телефонға келген кодты айтуды сұраған.
Қыз кодты айтқаннан кейін арада біраз уақыт өткен соң оған тағы бір бейтаныс ер адам қоңырау шалады. Бұл жолы ол өзін банк қауіпсіздік қызметінің өкілі ретінде таныстырып, әлгі код алаяқтардың қолына түскенін және жәбірленушінің атына несие рәсімделіп жатқанын айтқан.
Алаяқ “қаражатты сақтау” сылтауымен қызды барлық ақшасын шұғыл түрде “қауіпсіз шотқа” аударуға көндірген. Нәтижесінде ол 7,5 миллион теңгені күдіктілер көрсеткен есепшотқа жіберген.
Полиция мәліметінше, қазіргі уақытта аталған дерек бойынша күдіктілерді анықтауға бағытталған жедел-іздестіру шаралары жүргізіліп жатыр.
Құқық қорғау органдары азаматтарды барынша сақ болуға шақырады. Мамандардың айтуынша, SMS немесе push-хабарламалар арқылы келетін растау кодтарын ешкімге айтуға болмайды. Сондай-ақ банктер мен құқық қорғау органдары ешқашан қаражатты “қауіпсіз шотқа” аударуды талап етпейді.