Олимпиада ойындарының күміс жүлдегері, Қазақстанның Ұлттық Олимпиадалық комитетінің президенті Геннадий Головкин World Boxing ұйымының президенті болып сайланатын болды, деп хабарлайды Aqshamnews.kz тілшісі ұйымның ресми сайтына сілтеме жасап.
World Boxing мәліметінше, Головкин 2025 жылдың 23 қарашасында өтетін конгресс кезінде аккламация жолымен президенттікке бекітіледі. Сол сәтте ол өкілеттілікті қазіргі президент Борис ван дер Ворсттан қабылдап алады.
Аккламация — шешім қабылдаудың жеңілдетілген рәсімі. Ұйым хабарлағандай, Геннадий Головкиннің кандидатурасын тәуелсіз сыртқы сарапшылардан тұратын тексеру комиссиясы қарап, сайлауға қатысуға толық мақұлдаған.
Айта кетейік, World Boxing — 2023 жылы құрылған халықаралық федерация. Ол Халықаралық Олимпиада комитетімен жұмыс істеп, бокс спортын Олимпиада бағдарламасына қайтаруды мақсат етеді. Бұған дейін Халықаралық бокс қауымдастысы (IBA) бірқатар даулы жағдайлардан кейін ХОК тарапынан тану мәртебесінен айырылған болатын.
2025 жылдың 25 ақпанында ХОК World Boxing ұйымына бокс спортын әлемдік деңгейде басқаратын халықаралық федерация ретінде уақытша тану берген.
