Алматы қаласының Түрксіб ауданындағы Азаматтық хал актілерін тіркеу бөлімінде ерекше неке қию рәсімі өтті. Алматыда туып-өскен ерлі-зайыпты Валерий және Зоя Ахмуртовтар шаңырақ құрғандарына 55 жыл толған мерейлі гауһар тойларын тойлады.
Жарты ғасырдан астам қол ұстасып, отбасылық өмірді бірге сүріп келе жатқан бақытты жанұяға Түрксіб ауданындағы Азаматтық хал актілерін тіркеу бөлімінің қызметкерлері және әкімдік өкілдері ерекше құрмет көрсетіп, жұбайлардың неке қию рәсімін ұйымдастырды. Жұбайларға Қазақстан Республикасының жаңа үлгідегі неке куәлігі табыс етілді. Түрксіб ауданы әкімдігінің Ардагерлер кеңесінің төрағасы Ғалия Асқарқызы мерейтой иелерін құттықтап, гүл шоқтары мен естелік сыйлықтарын берді.
Салтанатты шараға Валерий мен Зоя Ахмуртовтардың ұлы Евгений, қызы Наталья және немерелері, отбасылық достары мен ет-жақындары қатысты. Олар әдемі жұптың неке жүзіктерімен алмасқан сәтіне куә болды. Әулеттегі тағы бір қуанышты жаңалық - 2 ай бұрын атай мен әжейдің шөбересі Максим дүниеге келді.
«Осыдан 55 жыл бұрын ақ көйлек киіп, қалыңдық атанған кезім есіме түсіп, көзіме жас келіп тұр. Өрімдей жап-жас едік. Біз бір қалада, бір аулада өстік. Валерий мен менің ағам жақсы дос болды. 20 жасымда туған күн кешінде бір-бірімізге сезіміміз оянып, сөзіміз жарасты, міне, содан бері біргеміз», – дейді Зоя әжей.
Валерий Ахмуртов әскери борышын өткеп келгеннен кейін, 1968 жылы 24 жасында сүйкімді аруға ғашық болып, мәңгілік бірге болуға ұсыныс жасайды. Өзі сымбатты, спортты жанына серік еткен, атқа мінгенді жақсы көретін, еңбекқор, гитарада шебер ойнайтын өнерлі жігітке тұрмысқа шығуға Зоя ару да қарсы болмапты.
«55 жылдық отбасылық өмірде жарқын, бақытты сәттеріміз көп болды. Бірақ екі адамның бір шаңырақ астында тату-тәтті өмір сүруі оңай емес. Сондықтан бүгінде отбасы құрып жатқан жас жұбайларға төзім, сабырлылық тілеймін. Махаббатты аялау үшін алдымен бір-біріне деген сыйластық керек. Бір отбасында «менікі», «сенікі» деген болмайды, бәрі ортақ. Бір-бірін кешіре білетін, бір - бірінің тіпті кемшілігін де жақсы көретін жұбайлар бақытты болады», – дейді Валерий Ахмуртов.